Ostensche hip hop

deze demo werd beraamd op mijn kot tijdens mijn (donkere) universiteitsjaren, volledig geproducet in FruityLoops (tegenwoordig “FLStudio”) en werd opgenomen in m’n toenmalige slaapkamer m.b.v. CoolEdit, vlak na een hevige klierkoortsaanval… (info in english on bandcamp page)

Teksten

Solipsistix

Track n°2 – de minachtieng enorm
èèn tekst is genoeg, vooroordèèln wordn gevormd
nu is ‘t een freaky beat die bangt op je wervelkolom
shit met t-effect, gepatenteerd deur Jerom
m’n ego een stik betong in m’n vuuste gebald
met de heldhaftigheid en spirit van Thorgal
op weg noa kwenie woar, 1 ticket noa nieverst,
2de klasse, ienkel,
een mc met een missie, noemt me gerust een Chninkel
of emceeasskix, klein moa dapper,
de joengere broere van Obelix
moa ton wel minder slapper
‘k en bedankt voe toverdrank
want ‘k zyn de nuchtere woordentapper
zoveel breinn droaain zo trage en ‘t myne des te rapper…

(of noemt me geweun Solipsistix…)

‘k geven gin geld uut an chicks of weedsticks
want chicks die zyn der nie
drugs da pakken’k nie
‘k en wel zwoare kosten voer een vette vinylmix
en komn zelfs nog nie toe voe 2 droaaiende Technics
nie zo praktisch
moa ‘t voornaamste is dank kunn bluven ventileren
verbaal experimenteren
joengleren met lettergrepen
nie deur iederèèn begrepen
me bic is geslepen
tekstn in check met m’n geweten
wack mc’s wordn buutngesmeten
weggereden in ambulances
met de nonchalance van Guust Flater
geven’k gestalte an de vastberoaden dader
zoveel shit die hapert by die zielloze na-apers
binnenkort zyn’t nie mèèr dan cargoloze kapers
beist dank ik verdervoaren op noa nieuwe horizonten
een zèè van haat binnenin, ‘k voeln m’n erte arter pompen
ziek van die sukkels, under shit is bekrompen,
‘k dissen ego’s glik Haddock toetdan z’op woare grootte zyn gekrompen

(… noemt me geweun Solipsistix…)

nix verloren nix gewonn
m’n odyssee is pas begonn
in 2002 uut de diepte geklomn
oenvermomd/oenverblomd
kommen’k op je ofgestormd
paniek alom – frisse inoed nieuwe vorm
de solipsistic samurai is eindelijk verrezen
oengeprezen moa skills worden met de seconde bewezen
d’ofwerkieng nog nie perfect moa ‘t resultoat magter wezen
en menschen die nog an me twyfeln moen den èèste Kuifje een kè goan lezen…

OeD Geweun Je Moend oa Je Niet Te Zeggen Et

der wordt te vele gerapt zoender goed concept
– een nummertje over weed, een tekstje tegen ‘t blok,
wa maatschappijkritiek, veel macho bullshit in wacke egotrips
en der wordt al ofgeklokt
de demo is kloar en der wordt al ofgedokt
vele lawijt, moa de mic wordt nie gerockt
ze krygen een nekke van een meter moa fans weten van nix beters
die shit doet me nix – ‘k zyn al lange resistent
en massa’s mèèr gewend dan da alombekend maintrend gezèver
bezint èèr da je begint fuckin’ bitch ass nègers!

oed geweun je moend oa je niet te zeggen et!! (x2)

nog zo’n twa: ‘t woordje innoveren
vele newbies proclameren mor inspireren gin reet
ze geraken nooit ier an’t eind van de meet
tragisch, nog moa zjuust roend an’t lopen en al last van sleet
– ik goan verder dan geripte beats
en sissy soft samples
rap van hoog niveau kid en joen kop is de drempel!
mc’en is mèèr dan imiteren en maken da’t rymt
ik wiln stuff briengn die steekoedt en diep deuredriengt
moe van aal die bagger zy moa zeker da’t stienkt
en ‘k zyn nie in voe wacke tracks woardat de Donna-kliek op swingt
beweeg noa ‘t zwarte of ‘t witte, bluuf nie dwaaln in ‘t grys
zwoare stormn verleggen de normn, een bries is mor een bries
aal die eenheidsworst, ‘k worden fuckin’ vegetarisch
de middenmoot een stille dood, de top legendarisch!!!

oed geweun je moend oa je niet te zeggen et!! (x2)

iets anders nu: massacommunicoatie
peure woanzin, bullshit, nix dan irritoatie
ik wiln nie worden opgebeld, gsm’s zyn de hel
fuck die woardeloze woorden, stilte is m’n metgezel
aal da banaal gsm-gebrabbel,
‘t komt van overaal en ‘t goat nieverst noatoe
doe me dus een plezier en oed je bek toe
is dat de moderne tyd man?
‘k krygen der ‘t schyt van
time is idd. money, moa je begrypt der niet van
je verliest tyd én geld, check je krediet man
en stop da gebiep in cinema’s, trings, bussen, metro’s, restorangs,
of je goat in gin tyd me vuuste vangn…

oed geweun je moend oa je niet te zeggen et!
oed geweun je moend oa je niet te zeggen et!
oed geweun je bek want je shit is wack!

Q.R.T.

nieuw product op de markt: Q. R. T.
Q.R.T Q.R.T. Q.R.T. Q.R.T.

‘k en een idee: een philips lampe van 10 Watt
èèn stroomoenderbreking en hèèl d’economie ligt plat
reclame sijpelt binn: de dagelijkse porties
oeveel winst vandejoare in de boeken van fortis?
tragische story’s in ‘t nieuws en ik missen de feeling
deze week in humo: de top 10 in drugsdealing
spytig van die kanker, marlboro girl was een snelle
en nog zo joenk op de koop toe/verzuup je verdriet met interbrew:
belgiës trots en èèn van ‘s wèrelds grotste harddrug producenten
der is een constante vraag nor industriezones
is danone nu van lu? of is lu van danone?
witte producten worden gespoten, gesmoord of gesnoven
binnenkort an rooie pryzen oa je de folders mag geloven
microsofte muziek in de rayongs van de gb
tip van de dag: perrier is een merk van nestlé
nikes in 2001: een ofschuwlijk design
hiphop is glik nutella: goed voe ‘t hoofd en de bèènn
de lokale toarte is klène, en ik wiln ook mor een hap
‘k zeggen ‘t kloar en dudelijk
zoender subliminale boodschap,

kopt geweun Q. R. T.
Q.R.T. Q.R.T. Q.R.T. Q.R.T.

damn, dubbele pech, m’n BMI is gestegen
m’n cola et warm en big macs zyn een olve euro opgeslegen
so what? die manager rydt roend met een dikke vette mercedes
vraagt em misschien ook een kè oatn content met z’n leventje is
nateurlijk goatn liegen, da moet geweun voe de schijn
“image is everything” – sprite commercial killed cobain
veel muzikanten zyn bedreven in aan & uutverkoop
niemand goat vryuut, smyt ze mor aal op een hoop
easy beats uut den aldi en easy teksten uut delhaize
fastfoodtracks zyn in: iedere trendshopper wilt ze
m’n casio gift an: ‘t is al were 5 voe 12
bluuf moa verderdoen met die shit, ‘t is nog nie te loate
doodslag is ‘t verdict, geld is het motief
en de vuuligheid kuus j’op met mr. proper of cif
bush kampt met chronisch tekort an O2 in z’n kop
inox ruimterakettenschild, nu te koop by maxi-stock
winkelkarretjes crashen, ‘t zyn solden by molecule
tiens, die lach van da fotomodel lykt nie oprecht op pellicule
verkopen is de formule, non-stop behoefte creëren
vlekkeloos imago dankzij dash en beist miljarden frauderen
“schatje, ‘k komn wa loater thuus” – lang leve proximus
sms’je nor uust – ‘k en nix beters te doen
de toekomst is orange, mobistars aan de hemel,
alle rust verloren en ‘t wc-papier groen
de actieve bevolking is grotendèèls passief
moa nie deze mc

sinds kort ook “poëtisch” actief: Q. R. T.
Q.R.T. Q.R.T. Q.R.T. Q.R.T.

Ofvalwoaterval (Innernet)

glik aaltyd allène
de kracht van de nacht
‘k horen veugels ziengn
allène voe mien
nie te geloven,
de duustere pracht
‘t wachten is nog lange
voe zunsopgang
m’n brein is helder
en dryft me verder
in een zèè van stilte
omarmd deur de kilte
allène op weg
en de nacht is de herder…

alles peur en intens
– ‘t contrast immens
in een woestijn verdwaald
en dieper ofgedwaald
in een verloren dal
– ‘k zien niemand ier,
niemand is overal
koed en verloaten,
‘k aanschouwn het niemendal
oentstoan deur erosie
van verborgen troann en emoties
ja emoties, moa da’s nu gedoan,
nu vloeit er nog allène m’n gedachtenstroom
‘k volgen de kroenkels stroomopwoarts
vuul woater troebel oendrienkboar
verder woadend, een lange weg te goan,
de tocht in m’n eigen
de kern van m’n bestoan
fuck, weer een vloedgolf, ‘k moen der an weerstoan,
grip verliezen is kiezen voe ‘t rijk van de fake!
oenstopboar op drift deur ‘t lauw woater
groen rood doods vul bloed en vergif

joaren passeren
verschrompeld
gestrompeld
gewandeld
gelopen
gezocht noa de bron
‘t ende van d’ellende blykt moa nie in ‘t zicht te komn

eindelijk, me tyd is gekomn
‘t einde van m’n reize
‘k horen m’n eigen peizen
woater klettert en spettert
– de kracht van de letter
‘k staren verlamd nor een zwart massieve wand
impressionant en verloaten
ofvalwoater uut de goaten
nu wordt alles dudelijk:
aal die joaren op dool
op zoek noa me motherfuckin’ ego-riool…

Nie Iederèèn

nie iederèèn is fan van easy jazz loops
nie iederèèn is fan van easy soul loops
nie iederèèn is fan van easy jazz loops
nie iederèèn is fan van easy soul loops
nie iederèèn is fan van easy jazz loops
nie iederèèn is fan van easy soul loops
nie iederèèn is fan van easy jazz loops
nie iederèèn is fan van easy soul loops
nie iederèèn is fan van easy jazz loops
nie iederèèn is fan van easy soul loops

M’n Geduld Is Op!

je zegt: tyd voer iets nieuws
moa je doet zjuust glik de reste
die shit is wel ok,
moa ‘t klienkt aal ‘t zelfste
zelfste samples
zelfste flows
zelfste rhymes
zelfste shows
je wilt doarmee iets bewyzen? komaan gast, gow!!!
je wordt nooit groot want je shit is middelmoatig
gedoemd voe cd-r, nooit vinylploatig
rappen, mixen, producen, breaken, graffn, ‘t is aal ambachtelijk
KUNST dus sukkel, doe nie zo achterlijk
expressie, verhaaln met een diepere bodem
en ‘t moe nie aaltyd even serieus of strikt volgens de code
nix gift mèèr kicks dan inspirerend werk
vooruutgang wordt geboekt en de voldoening is echt
‘t zyn mèèstal nie de grotste die ‘t mèèste verkopen
en ‘t zyn mèèstal nie de grotste die met de èèr goan lopen
‘t zyn de gasten die de stiel verkloten
deur te handeln glik hoeren en under ziel te verkopen
an nitwits die promoten
sjieke fèèstjes op boten, riante villa’s, kastèèln,
‘t ku m’aal gin zak schèèln
moa ze beheersen de radio, controleren aal de netten,
zo bescheten dank m’n radio nie mè durven anzetten
fucking plooiers voe de industrie
rekent mien doa moa nie by
ik doen wa da’k voeln, nooit tyd voe te bekoeln
van ‘t moment dat er èèn gast zegt:
“yo, die shit is cool”
straight up, oprecht,
wordt me motivatie groter en goan’k deure met m’n gevecht
– headz doen inzien da je respect moe verdienn
deur authenticiteit, skills en vet te emceeën
bluuf je’n eigen, inspireer met ingenieuze oentwerpen
verveel nie deur je’t oenderwerpen an de vaste oenderwerpen
je wilt ‘t toch doen? goa je teksten anscherpen
kunst wordt nie bedreven voe de kortzichtige elite
en myn raps zyn nie geschreven voe puberale mieten
als top 30 hit of tip by radio 2
kunst en commerce, oed ze liefst nog een bitje geschèèn

kritiek wordt veelal gestoeld op zjaloezie en hebzucht
zakken lucht worden gehypet met veel marketing en promotie
een attractief design voer een leeg plastic doosje
vlamsche showbizz rapbizz housebizz shitbizz
goed verpakt goed vertaald goed betaald goed bekakt
moa der is publiek voren dus ‘t oedt z’n eigen intact
– slikt da publiek werkelijk alles
da zelfs stroent goed smakt?
enfin, danze moa doen, nie echt me wèreld,
d’ergste nachtmerrie voer een hardcore hiphop kèrel…

‘k kunn in feite mor èèn twa besluten achter aal die zèver in zaksjes:
tyd voer een poar explosieve vergeldiengsacties
indoctrinatie leidt vroeg of loate toe verzet
confrontatie oenafwendboar, d’èèste stappen zyn gezet
de pers en muziekindustrie zyn verre van heilig
dus gin mediagebouw is vanaf heden nog veilig
uzi’s, handgranoaten, bivakmutse, kogelvry vesten
– ‘t ligt aal gerèèd, ‘t kut elk moment gebeuren
‘t spelletje hangt m’n strot uut, die leugen bluuft nie deuren
en alle bitch ass producers die meedroaain verdienn
een vulle clip leeggepompt in under kop
m’n geduld is op!
m’n geduld is op!
m’n geduld is op!
m’n geduld is op!
m’n geduld is op!
M’N GEDULD IS OP!

mèèr geld of mèèr diepgang – wa wordt je leuze?
we leven in een vry land, mak je keuze
je kut doen glik mien,
of je kut doen glik de massa
de massa kent mor èèn weg
en da’s de weg noa de kassa…

Burn Out Man

‘s nacht op wandel in oenbekende stroaten
èèn verkèèrde blik en ‘t is voe johnnies te loate
mentaal worden ze gecrusht onder ‘t mom van een grijns
moesten ogen kunn doden zyn’k een heavy seriemoordcase
‘k zeggen gin woord, doen totaal nix overbodig
alles superefficiënt, dus joen gezaag en’k nie nodig
introspectie leidt toe nauwgezette analyses
overdudelijk is te zien oe fucked up da joen advies is
de sleutel van de de poorte noa myn realiteit
zit verspreid over m’n brein en da’s m’n sterkste zwakheid
– alle naïviteit werd abrupt deurbroken
oa’t de hèle fuckin’ puzzel in makoar was gestoken
oa zelfkennis kracht is, zynk ik nu een atoombom
vroeger was’t anders, ton hielden’k constant m’n eigen dom
‘k en vele tyd verspild, moa ‘k en der ook vele uut gelèèrd:
leegte ventileren voedt die leegte nog mèèr
iets verwachten van ‘t leven, leven op hoop is verkèèrd

‘k geloven enkel in m’n eigen, ‘k zyn toe m’n ego bekèèrd
ik zyn god almachtig en ook omgekèèrd

is dat hier nu alles, of ister nog mèèr?

vragen vuln de dagen van oengevulde magen
achter veel versleten bics bluuft d’oenzekerheid knagen
vragen vuln de dagen van oengevulde magen
achter veel versleten bics bluuft d’oenzekerheid knagen

‘k en trachten zwarte gedachten uut te zwèten glik de griep
voorby die fase ister nix of niemand die me biendt
en worden’k de peure incarnatie van actie
met de doeltreffendheid/vastberoadenheid die grenst an de perfectie
hiphop war chants – paranoia voe de stilte
existentiële oenger – nix of niemand stilt ze
die manier van leven, die manier van redeneren,
is cruciaal en bepalend, der is gin weg were
ratio overheerst, oenderdrukte lusten
moa peizen et gin zin, gin tyd voe te berusten
en ‘k geven gin zak om wat de toekomst belooft:
‘t leven is je nix verschuldigd buutn de dood
de minuten goan trage, de dagen goan rap
burn out man strykt wederom de breinkroenkels plat
een dag goat voorby in de stienkende grootstad…

vragen vuln de dagen van oengevulde magen
achter veel versleten bics bluuft d’oenzekerheid knagen
vragen vuln de dagen van oengevulde magen
achter veel versleten bics bluuft d’oenzekerheid knagen

sloof je nie uut voe me van gedacht te doen veranderen
een loner et gin boodschap an medelijden van anderen
m’n plafong is wit, de gordynn gesloten
verstoten, oenaantastboar in m’n cel weggekropen
weeral voe 5 dagen tegen niemand gesproken
m’n rute toe – voorda je ‘t wit is eenzaamheid binngeslopen
telefong goat, rap volume noa beneen
‘k pakken zère op en speeln ‘t spelletje mee
cliché vragen /oppervlakkige antwoorden
verdoken monologen die de brède kloof verwoorden
d’ènigste optie is lachen en de boel relativeren
ik kunn toch nie met andermans ervoariengn relateren
m’n kop op oentploffen/ m’n ogen toe
moe glik Al Green, zo motherfucking moe
blues in m’n DNA, nafte in m’n bloed
permanent oendergedompeld in een doenkere mood
voer eeuwig gebrandmerkt – een netvlies vul schreven
verdergesleurd deur de kick van ‘t overleven
weinig krygen, vele geven en toch nog bluven geven
de dagen van oenschuld een ver en vaag verleden
focus op oeneindig – nooit de realiteit oentweken
veel soortgenoten zoen nu al lange zyn bezweken
hoop en illusies worden terplekke vermoord
burn out man zet z’n helse zoektocht voort…

Ik Doen Deure

ik moen nie roepen dank hard zyn, luustert noa m’n sound
myn name gift weer betèkenisse an ‘t begrip underground
en ‘k goan me nie wegsteken achter een crew
ik briengn m’n joints solo
stereo klank, 1 man op de mic mono
op me demo gin featurings, m’n tracks zyn te persoonlijk
te veel gasten zien ‘t te rooskleurig en blyken al op voorhand opgefuckt
ze overschatten under eigen en peizen da sebiet alles lukt
glik bitches zoender sex-appeal veesteveel opgesmukt
beats – gin fut, te trage, energieloos, slap,
goed voe 5 minuten en ton en’k al gezapt
zo weinig menschen zien de woarheid oender ogen:
gy viendt ze super? voe mien en ze gezogen
iedere leek is zo rap geïmponeerd deur een hoop posers op een podium
in de plekke van bier, zy je soms beter of met een sixpack Immodium
en ‘k weten, kritiek leveren is gemakkelijk, dat is een universeel gegeven,
doarom dan’k zelf iets oendernoomn ‘en en nu recht op kritiek ofstevenn
de standaard moet geweun ogter, ‘t is te verre gekomn

mèèstal weten’k nie voe wien of woarom
mor ik doen deure en de reste kut me nie bomn

een groep is even sterk glik z’n zwakste schakel
tyd en m’n eigen zyn en woaren voe myn d’ènigste obstakels
‘k en 2 joar zitten prutsen op m’n kot voe de fun zoender doel
vlamsche shit is wel cool, moa ‘k kunn mèèstal moeilijk relateren
zoveel vuulbakhop die nieverst op sloeg, ‘k moesten wel reageren
vele groeptjes proberen, moa proberen is nie genoeg
ik verteln wattank peizen, en watdatter ier quasi nooit wordt gezeid
down-to-earth perceptie, expressie gebaseerd op woare feiten
afkèèr van hèèl ‘t systèèm op zelfgekwèèkte muziek
vryheid van mènieng in een achterlijke pattattenrepubliek
in tydn van sex, geld, zwakte en ego-centrisme
beschaamd in m’n eigen soort os je me begrypt me
op de snelweg vulle voart noa dementie en kanker
en de toekomst uutzichtloos in een wèreld vul jankers
godverdomme…
wa lopenkik ier nog te doen op die stienkende bol?

mèèstal weten’k nie voe wien of woarom
mor ik doen deure en de reste kut me nie bomn

‘t is pas in noodsituaties da je ziet oe dat een mens echt is
da beschaving nie mèèr is dan een din laagsje vernis
check aal die plastrongdragende vetzakken
schrèmende baby’s in moatpakken
gezinsdrama’s voltrokken – ziet de beurskoersen zakken
zoogdieren met pretentie die under angsten wegsteken
meelopen met de kudde en zelfstandigheid preken
mannetjes geilen op alles da beweegt en volgen under pik
zupen en zèveren à volonté en sommigte betaaln zelfs voe seks
de mèèste vrouwtjes voaln op macho’s, homo’s of johnny-loser-types
moa da wiln z’in feite nie echt – ‘k vragen m’of watdat de logica is
gemaskeerde instincten bepaaln blykboar de gang van zaken
bèèsten benauwd voe te sterven dus zère zère kiendjes maken
een voortgezet leven voe ‘t eigen leven weer zin te geven
droomn en trauma’s projecteren en kneden noa ‘t moatschappelijk model
iederèèn volgt blindeliengs de weg en redt intusschentyd z’n eigen vel
losbreken is gin lachertje, ze proberen je constant te kraken
enkel dedee die ‘t slim speeln kun der misschien ooit uutgraken
vraag is of dat die transitie positief overhelt
‘t nut van alles en nog wa wordt nog mèèr in vraag gesteld
ups en downs versus sleur en een soaai bestoan
kunstmatige orde of chaos, welke weg moe j’insloan
de keuze ligt echter al vaste voorda j’em zelve moe maken
gin heden zoender verleden en je genetische baken
de blinden dirigeren deur de massa te representeren
de bewusten observeren en proberen in grote mate te negeren
voe wien of wa doen’k ‘t nog in feite?
voe die kleine oenzichtboare kern die in alle stilte gromt?

mèèstal weten’k nie voe wien of woarom
mor ik doen deure en de reste kut me nie bomn

Breinactiviteit

is de mens een organische machine?
is het eigen bestoan dé realiteit?
leidt zelfreflectie noodgedwoengn toe slapeloosheid?
zyn vrouwn de materialisatie van wiskunde en schoonheid?
zyn’k ik de personnificatie van leegte en rusteloosheid?

is talent hedendaags nog een noodzaak?
bestoan der nog menschen met ersens en die beschikken over smaak?
is hooverphonic een hype of roenduut goedkoop?
wordt betong de nieuwe basis van èèn globale biotoop?
maken zwembadreizen een mens mèèr open?
is’t vlams blok mèèr dan een stelletje dommekloten?
behoren trots en èèrlijkheid vanaf nu toe’t verleden?
ister sprake van vrede os dialoog wordt vermeden?
is bewustzijn een byproduct van breinactiviteit?
stoan blanken by zwarten gin miljarden in ‘t krijt?
wordt hiphop ier groot of bluuft ‘t hangn oenderweg?
is haat een werkwoord? ligt ****** op m’n weg?
ister nog een twien die noapeist voordatn een twa zegt?
kunn de grenzen van een sportman eindeloos worden verlegd?
woaren vrouwen echt zo lèlijk in de joaren tachtig?
of was de mode zo passé en krampachtig hoerachtig?
zyn ufo’s een hoax? diggen headz m’n demo?
is elke mc straight? elke showhost een homo?
is fundamentalisme een bedreiging voe ‘t westen?
is hiphop z’n eigen hof nie an’t overbemesten?
bestoat er iets als vrije wil in uus mysterieus brein?
of wordt alles deur ‘t oenderbewuste oendermijnd?
stoan banken by zwarten gin miljarden in ‘t krijt?
is geld evenwoardig an gerechtigheid?
woarom zyn rappers zo benauwd van mp3’s uut te geven?
peist er echt een twien van z’n cd’s en tapes te kunn leven?
et een mens soms het recht de wet ‘t overtreden?
iets op tegen dank fakers ofknaln
nu en ier zoender reden?
dank nie zweven in de toekomst mor opereren in ‘t heden?
en ister een reden dank nie mixen met menschen?
zyn’k van een andere soort, incompatibel met de reste?

is’t meugelijk driften met je verstand te verdryven?
komt er een tyd dat alles is gezeid
en de drang weg voalt voe te schryven?
stoat een relatie gelyk an verzanden in naïviteit?
is’t driengend tyd voe groot onderhoud en nieuwe banden?

zoeter overbevolking zyn oster gin muziek was?
kut een computerscherm vliegen dwars deur dubbel glas?
is H2O een gas of een vloeistof?
is biten een misdoad of een uiting van lof?
zyn geschiedenisboeken non-fictie of fictie?
is een wetenschapper schepper van constructieve religie?
intelligentie: een levenslange vloek of een zegen?
wordt oprechtheid geapprecieerd of aan’k beter gezwegen?
is de wèreld een extensie van m’n destructieve visie?
is de paus vermoorden een wettige vorm van euthanasie?
is de mens carnivoor of geboren vegetariër?
woar zit het verstand in het ras van de ariër?
wat is de surfer’s garantie voer online privacy?
op welke marketingstrategie steunt je provider z’n policy?
is voe joen de vorm of boodschap prioritair?
rap is een spel, moa wien speelt ‘t fair?
et ‘t nog zin van te vechten oat de strijd al verloren is?
zyn aal m’n vragen strikt rhetorisch /weten’k soms wa’t antwoord is?

Review

RifRaf, februari 02002

Enkele optredens volgden…

Hoogtepunt: Gentse Feesten, Kinky Star, juli 02002